सार्वजनिक स्थलप्रतिको जिम्मेवारी र सामाजिक सेवाको भावनालाई आत्मसात् गर्दै म्याग्दे गाउँपालिका–३ स्थित बेल्टारको दैनिक ठाँटी सरसफाइ तथा खानेपानीको व्यवस्था गर्ने कार्यमा कुशल श्रेष्ठ निरन्तर सक्रिय रहँदै आएका छन्।
बेल्टार क्षेत्रमा स्थानीय बासिन्दा तथा यात्रुहरूका लागि प्रयोग हुने ठाँटीलाई सफा, व्यवस्थित र स्वच्छ राख्नुका साथै नियमित रूपमा खानेपानीसमेत राखिदिने कार्य श्रेष्ठले गर्दै आएका हुन्। व्यक्तिगत लाभभन्दा सामाजिक उत्तरदायित्वलाई प्राथमिकता दिँदै उनले लामो समयदेखि निरन्तर रूपमा यस्तो सेवा गर्दै आएको स्थानीयहरू बताउँछन्।
सार्वजनिक स्थल सफा राख्ने, यात्रु तथा सर्वसाधारणका लागि सहज वातावरण निर्माण गर्ने र आवश्यक पर्दा खानेपानी उपलब्ध गराउने उनको प्रयास सामाजिक सेवाको उदाहरणका रूपमा देखिएको छ।
समाज परिवर्तनका लागि ठूला अभियान मात्र आवश्यक हुँदैनन्, दैनिक जीवनमा गरिने यस्ता साना तर निरन्तर सेवामूलक कार्यले पनि समुदायमा सकारात्मक प्रभाव पार्ने गर्दछ। कुशल श्रेष्ठको यो पहलले ‘आफ्नो ठाउँ, आफ्नै जिम्मेवारी’ भन्ने भावना विकास गर्न प्रेरणा दिएको छ।
स्थानीयहरूले पनि श्रेष्ठको सामाजिक सेवाभावको प्रशंसा गर्दै सार्वजनिक स्थलको संरक्षण तथा सरसफाइमा सबैले आ–आफ्नो तर्फबाट सहयोग गर्नुपर्ने बताएका छन्।
प्रतिक्रिया दिनुहोस्