तनहुँ, म्याग्दे — ग्रामीण भेगका नागरिकहरूलाई घरआँगनमै विशेषज्ञ स्वास्थ्य सेवा उपलब्ध गराउने उद्देश्यले तनहुँको म्याग्दे गाउँपालिका वडा नं. ६ मा एकदिने निःशुल्क बृहत् स्वास्थ्य शिविर सम्पन्न भएको छ।
म्याग्दे गाउँपालिकाको स्वास्थ्य शाखा र वडा कार्यालयको संयुक्त आयोजना तथा स्थानीय स्वास्थ्य संस्थाको प्राविधिक सहयोगमा उक्त शिविर सञ्चालन गरिएको हो। वडावासीहरूलाई लक्षित गरी आयोजना गरिएको यस शिविरमा स्त्रीरोग, बालरोग, सामान्य चिकित्सा (जेनेरल मेडिसिन), मधुमेह र उच्च रक्तचाप (नसर्ने रोग) सम्बन्धी विशेषज्ञ परीक्षण सेवा प्रदान गरिएको थियो।
शिविरको उद्घाटन गर्दै गाउँपालिकाका अध्यक्ष श्रीप्रसाद श्रेष्ठले आर्थिक अभाव वा अन्य विविध कारणले समयमै अस्पताल जान नसक्ने ग्रामीण क्षेत्रका नागरिकहरूको स्वास्थ्य परीक्षण सहज बनाउन स्थानीय सरकारले यस्ता कार्यक्रमलाई निरन्तरता दिँदै आएको बताए। त्यसैगरी, वडा नं. ६ का वडा अध्यक्षले आफ्नो वडाका नागरिकहरूको स्वास्थ्य सुरक्षालाई प्राथमिकतामा राखेर आगामी दिनहरूमा पनि थप लक्षित स्वास्थ्य सचेतना र परीक्षण कार्यक्रमहरू सञ्चालन गर्ने प्रतिबद्धता व्यक्त गरे।
दिनभर सञ्चालन भएको उक्त शिविरमा वडा नं. ६ तथा आसपासका क्षेत्रबाट आएका ३५० भन्दा बढी सर्वसाधारणले स्वास्थ्य परीक्षण गराएका थिए। शिविरमा उपस्थित बिरामीहरूलाई चिकित्सकको सल्लाहबमोजिम निःशुल्क रूपमा आवश्यक औषधि समेत वितरण गरिएको गाउँपालिका स्वास्थ्य शाखाले जनाएको छ।
प्रतिक्रिया दिनुहोस्