कार्यक्रमको मुख्य आकर्षणको रूपमा 'फुड फेस्टिभल' (Food Festival) आयोजना गरिएको थियो, जहाँ विद्यार्थीहरूलाई तिहारको मुख्य परिकार सेलरोटी पकाउन सिकाइएको थियो। परम्परागत ढङ्गले सेलरोटी कसरी बनाइन्छ र यसको सांस्कृतिक महत्त्व के छ भन्नेबारे शिक्षक र पाका अभिभावकहरूको सहजीकरणमा विद्यार्थीहरूले प्रत्यक्ष अनुभव लिने अवसर पाएका थिए।
यसैगरी, आधुनिकतासँगै हराउँदै गएको मौलिक सीपलाई जगेर्ना गर्न विद्यालयले 'सालको पातको टपरी बुन्ने' प्रतियोगिता तथा प्रशिक्षण समेत सञ्चालन गरेको थियो। विद्यार्थीहरू निकै उत्साहका साथ सालको पात गाँस्न र टपरी बनाउन व्यस्त देखिन्थे। चाडपर्वमा प्लास्टिकका सामग्रीको सट्टा प्राकृतिक र आफ्नै हातले बुनेका टपरी प्रयोग गर्नुपर्छ भन्ने सन्देश दिन यो कार्यक्रम प्रभावकारी बनेको विद्यालयले जनाएको छ।
विद्यालयका अनुसार यस्ता प्रयोगात्मक क्रियाकलापले विद्यार्थीहरूमा आफ्नो कला, संस्कृति र परम्पराप्रति गर्व गर्ने भावना जागृत गराउन मद्दत पुग्दछ। कार्यक्रममा विद्यार्थीहरूले तिहारका गीतहरूमा नृत्य प्रस्तुत गर्नुका साथै सामूहिक रूपमा देउसी–भैलो खेलेर रमाइलो समेत गरेका थिए।
Post a Comment