 |
| नेयमार भन्छन् बार्सिलोना छाड्नु मर्नु |
पेरिस सेन्ट जर्मेन (पीएसजी) बाट डेब्यु गरेपछि ब्राजिलियन स्टार स्ट्राइकर नेइमारले बार्सिलोना छाडेको विषयमा प्रतिक्रिया दिँदै आफूले पहिलेभन्दा धेरै बढी सजीव र ऊर्जावान् महसुस गरेको बताएका छन्।
विश्व कीर्तिमानी ट्रान्सफर रकममा स्पेनिस क्लब बार्सिलोना छोडेर फ्रेन्च क्लब पिएसजीमा आबद्ध भएका २५ वर्षीय नेइमारले आइतबार राति पिएसजीका लागि पहिलो खेल (डेब्यु) खेलेका थिए। उक्त खेलपछि सञ्चारकर्मीहरूसँग कुराकानी गर्दै उनले बार्सिलोना छाड्नुलाई गलत अर्थमा बुझ्नेहरूलाई गतिलो जवाफ दिएका छन्।
नेइमारले भनेका छन्, “मानिसहरू सोच्छन् कि बार्सिलोना छाड्नु भनेको मर्नु वा फुटबल करिअर समाप्त हुनु हो। तर, यहाँ वास्तविकता ठीक उल्टो भएको छ।”
उनले आफ्नो खुसी व्यक्त गर्दै थप भने, “म सधैँभन्दा बढी सजीव छु। म पूर्ण रूपमा खुसी छु र फुटबल भनेको आखिर फुटबल नै हो। यहाँ केवल देश, सहर र टिम मात्र फेरिएको छ, तर मैदानभित्र खेलिने फुटबलको आत्मा र तरिका भने उस्तै छ।”
आइतबार राति भएको खेलमा पिएसजीले गुइनगाम्प (जियनगुइन) लाई ३–० गोल अन्तरले पराजित गरेको थियो। उक्त शानदार जितमा नेइमारले टोलीका लागि उत्कृष्ट प्रदर्शन गर्दै तीन वटै गोलमा महत्त्वपूर्ण भूमिका निर्वाह गरेका थिए।
साधारणतया मैदानको बायाँ साइडबाट मात्र खेल्ने बानी परेका नेइमारलाई पिएसजीका प्रशिक्षक उनाइ एम्रेले भने मध्यक्षेत्र (मिडफिल्ड) सम्म पुगेर खेल्ने र स्वतन्त्र रूपमा आक्रमण बुन्ने पूर्ण छुट दिएका थिए। नयाँ क्लबमा पाएको यो स्वतन्त्रता र खुल्ला वातावरणले आफ्नो खेललाई अझ निखार्न सहयोग पुगेको उनको बुझाइ छ।
प्रतिक्रिया दिनुहोस्